Gobolka Banaadir oo mamnuucay in ardayda albaabka laga xiro

Muqdisho (Dawan ) – Agaasinka Waxbarashada Gobolka Banaadir ayaa soo saaray go’aan cusub oo mamnuucaya in ardayda ka soo daahda goobaha waxbarashada la ciqaabo iyadoo albaabka laga xirayo. Go’aankan ayaa yimid kadib wadatashi iyo falanqeyn dhinacyo badan leh oo la sameeyay, iyadoo maamulka dugsiyada loo oggolaaday inay dejistaan habraac cusub oo lagu xakameynayo daahitaanka ardayda, balse aan saameyn ku yeelan karin waxbarashadooda.

Agaasimaha Waxbarashada Gobolka Banaadir, Maxamed Cabdi Xasan, ayaa sheegay in go’aankan cusub uu yahay mid lagu horumarinayo nidaamka waxbarashada iyo ilaalinta xuquuqda ardayda, iyadoo la raacayo siyaasadda ah in ardayda aan laga hor istaagin waxbarashada sababo la xiriira daahitaan.

“Waxaan mamnuucnay in ardayda ka soo daahda goobaha waxbarashada ciqaab ahaan albaabka looga xiro,” ayuu yiri agaasimuhu.

Soomaaliya waxaa caado ka ah, gaar ahaan goobaha waxbarashada, in ardayda ka soo daahda waqtiga loogu talagalay imaanshaha dugsiga laga xiro albaabka, laguna celiyo bannaanka dugsiga, iyadoo ciqaab looga dhigayo inay maalintaas ka maqnaadaan casharrada.

Sidoo kale, waalidiinta ayaa lagu boorrinayaa inay ka caawiyaan ardayda ilaalinta waqtiga, si looga fogaado daahitaanka, taasoo ka caawin karta inay si wanaagsan ula qabsadaan nidaamka cusub.

Go’aankan ayaa loo arkaa mid isbeddel weyn ku keenaya habka loo maareeyo daahitaanka ardayda, iyadoo la xoojinayo muhiimadda waxbarashada, isla markaana aan loo oggolaan in daahitaan ama ciqaab uu ka hor istaago helitaanka waxbarasho.