Golaha Deegaanka Banaadir ee la doortay oo dhawaan la dhaarinayo

Muqdisho (Dawan ) –– Guddoomiyaha Guddiga Madaxa-Bannaan ee Doorashooyinka Qaranka iyo Soohdimaha, Cabdikariim Axmed Xasan, ayaa sheegay in dhawaan la dhaarin doono xubnaha golayaasha deegaanka ee Gobolka Banaadir, kuwaas oo la doortay 25-kii December 2025.

Guddoomiyaha ayaa hadalkan ka sheegay kulan ay maanta Muqdisho ku yeesheen ururrada siyaasadda dalka, isagoo xusay in sidoo kale ay dhowaan bilaaban doonaan doorashooyinka golayaasha deegaanka ee dowlad-goboleedyada kale ee dalka.

Cabdikariim Axmed Xasan ayaa sheegay in la dhaarin doono 390-ka xubnood ee golayaasha deegaanka, wuxuuna carrabka ku adkeeyay in waajibaadka guddigu ku egyahay dhaarinta xubnahaas, kaddibna ay si rasmi ah u bilaabi doonaan doorashada hoggaanka golayaasha.

“Shaqadayadu waa in aan hubinno in marka xubnaha la dhaariyo ay si sharci ah u guda galaan doorashada hoggaamiyeyaasha golayaasha,” ayuu yiri guddoomiyuhu.

Sidoo kale, wuxuu sheegay in ururrada siyaasadeed loo oggolaaday inay bilaabaan ololaha doorashooyinka ee dowlad-goboleedyada, isagoo tilmaamay in kulan uu la yeeshay Madaxweynaha Hirshabeelle, Cali Cabdullaahi Xuseen (Cali Guudlaawe), lagu go’aamiyay in ururradu si rasmi ah uga bilaabi karaan ololahooda deegaannada maamulkaas.

Guddoomiyaha Guddiga Doorashooyinka Qaranka ayaa intaa ku daray in dhawaan uu u safri doono Dowlad-goboleedka Koonfur-Galbeed, halkaas oo uu kula kulmi doono Madaxweynaha maamulkaas, Cabdicasiis Xasan Maxamed (Laftagareen), si ay uga wada hadlaan suurtagalnimada in ololaha doorashooyinka laga bilaabo deegaannada Koonfur-Galbeed.

Ugu dambayn, Cabdikariim Axmed Xasan ayaa sheegay in guddigu sii wadi doono diyaarinta iyo qabanqaabada doorashooyinka ka dhici doona gobollada kale ee dalka, si loo xaqiijiyo in nidaamka doorashooyinka uu noqdo mid hufan, daahfuran, isla markaana waafaqsan sharciga.