Golaha Mustaqbalka oo ku hanjabay dejinta jadwal doorasho cusub

Muqdisho (Dawan) – Golaha Mustaqbalka Soomaaliyeed ayaa shaaca ka qaaday inay dejin doonaan jadwal doorasho haddii dowladda Federaalka Soomaaliya ay ku adkeysato go’aankeeda la xiriira hannaanka doorashooyinka, sida lagu sheegay war-saxaafadeed ay soo saareen.

Golaha ayaa arrintan soo bandhigay xilli ay sheegeen in 14-ka Abriil 2026 si rasmi ah uu u dhammaaday muddo-xileedkii Golaha Baarlamaanka Federaalka Soomaaliya, taas oo dhalisay walaac la xiriira xaaladda dastuuriga ah ee dalka.

War-saxaafadeedka ayaa lagu xusay in Madaxweynaha Soomaaliya uu shacabka kala dooransiinayo laba doorasho oo aan la aqbali karin, kuwaas oo goluhu ku tilmaamay inay horseedi karaan qalalaase siyaasadeed iyo xasillooni darro.

Golaha Mustaqbalka ayaa si gaar ah uga digay in haddii aan xal laga gaarin arrinta doorashooyinka ka hor 15-ka May 2026—oo ah marka uu dhammaanayo muddo-xileedka Madaxweynaha ee afarta sano—ay suuragal tahay in dalka uu galo xaalad siyaasadeed oo cakiran.

Goluhu wuxuu sheegay in haddii dowladda ay ku adkeysato go’aanno hal dhinac ah, ay qaadi doonaan tallaabooyin siyaasadeed, oo ay ku jirto dejinta jadwal doorasho oo ay u arkaan mid waafaqsan dastuurka, heshiisyada qaranka, iyo matalaadda shacabka Soomaaliyeed.

Dhanka kale, goluhu wuxuu ugu baaqay beesha caalamka inay taageerto geeddi-socod doorasho oo waafaqsan dastuurka, isla markaana laga fogaado tallaabo kasta oo khatar gelin karta dowladnimada Soomaaliya.