Muqdisho(Dawan) – Golaha Mustaqbalka Soomaaliyeed ayaa shaaciyay inuu ansixiyay hannaan doorasho toos ah oo xilliga kala-guurka ah, kaas oo uu ku tilmaamay waddo looga bixi karo cakirnaanta siyaasadeed ee muddooyinkii dambe hareysay geeddi-socodka doorashooyinka dalka.
War-saxaafadeed uu goluhu soo saaray 20-ka Juun 2026 ayaa lagu sheegay in hannaanka cusub, oo loogu magac daray Transitional Direct Elections Model, loogu talagalay in lagu qabto doorasho loo dhan yahay, heshiis lagu yahay, isla markaana leh sharciyad iyo kalsooni siyaasadeed.
Goluhu wuxuu sheegay in soo jeedintan ay saldhig u tahay tanaasul siyaasadeed iyo tixgelinta rabitaanka shacabka Soomaaliyeed ee ku aaddan in xal degdeg ah laga gaaro khilaafaadka soo noqnoqday ee doorashooyinka.
Sida lagu sheegay war-saxaafadeedka, hannaanka cusub wuxuu isku waafajinayaa xaqa muwaadiniinta Soomaaliyeed ay u leeyihiin inay si xor iyo toos ah u doortaan wakiilladooda, iyadoo isla markaana la ilaalinayo hab-qaybsiga matalaadda beelaha ee 4.5.