Jigjiga oo Martigelisay Shirweynaha Sanadlaha ah ee Barnaamijka Biyaha, Fayadhowrka iyo Nadaafadda

Siyaad Nuur Cabdi, madaxa Xafiiska Biyaha ee Dowlad Deegaanka Soomaalida, ayaa sheegay in shirka laga filayo inuu horseedo is-afgarad, casharro laga faa’iideysto iyo qorshayaal wax ku ool ah oo lagu sii xoojinayo natiijooyinka barnaamijka ee Bariga Afrika. Waxa uu sheegay in barnaamijka R-WASH, oo ay maalgeliso Bangiga Horumarinta Jarmalka (KfW), isla markaana ay iska kaashadaan hay’ado ay ka mid yihiin UNICEF iyo UNHCR, uu ka shaqeeyo Itoobiya, Soomaaliya, Kenya iyo Suudaan. Shirka sanadlaha ah ayaa fursad u siinaya bahwadaagta inay dib u eegaan hawlihii sannadka la soo dhaafay, isla markaana dejiyaan qorshayaasha mashaariicda la fulin doono sannadka xiga.

Dowlad Deegaanka Soomaalida waxaa ka socda mashaariic dhanka biyaha ah oo laga hirgelinayo deegaannada Awbare, Sheed-dheer iyo Qabribayax, iyadoo mashruuc kasta loo qoondeeyay 1.2 bilyan oo birr Itoobiya ah, una dhiganta qiyaastii 7.4 milyan oo doollar, sida uu sheegay Siyaad Nuur Cabdi . Waxa uu xusay in mashaariicdan loogu talagalay in lagu horumariyo helitaanka biyo nadiif ah oo ammaan u ah caafimaadka qaxootiga iyo bulshooyinka martida loo yahay. Siyaad ayaa sidoo kale sheegay in heerka helitaanka adeegyada biyaha ee Dowlad Deegaanka Soomaalida uu gaarayo qiyaastii 52%, iyadoo maamulka deegaanku uu doonayo inuu ballaariyo adeegyada si wax looga qabto baahiyaha weli jira.

Shirka ayaa la filayaa inuu gacan ka geysto aqoonsiga galdaloolooyinka ka jira mashaariicda socda iyo xoojinta isku-duwidda hay’adaha dowladda iyo bahwadaagta horumarinta.