Maxaa iska beddelay amniga Baydhabo tan iyo larkii la doortay Aadan Madoobe?

Hoggaamiyaha ayaa si gaar ah u xusay magaalada Baraawe iyo deegaannada gobolka Bakool, isaga oo sheegay in maamulkiisu doonayo in la gaaro xaalad ay dadka iyo mas’uuliyiintu si xor ah ugu safri karaan waddooyinka, iyaga oo aan ka cabsi qabin weerarro. Waxa uu sidoo kale sheegay in xukuumaddiisa ay ka go’an tahay ka shaqaynta amniga, dowladnimada iyo sidii Al-Shabaab looga saari lahaa deegaannada ay weli maamusho.

Dhanka dhaqaalaha, waxa uu sheegay in xukuumaddiisu bilowday barnaamijyo lagu horumarinayo maamulka maaliyadda, gaar ahaan adeegsiga nidaamyada dijitaalka ah, si loo kordhiyo hufnaanta iyo kalsoonida bulshada. Hoggaamiyaha ayaa bogaadiyay dadaallada Wasaaradda Maaliyadda Koonfur Galbeed, isaga oo sheegay in horumarinta dhaqaalaha ay muhiim u tahay ballaarinta adeegyada dowladda iyo dib u soo kabashada deegaannada ay colaadaha saameeyeen. Waxa uu sidoo kale ka hadlay qorshayaasha lagu xoojinayo caddaaladda iyo dowlad-wanaagga, isaga oo sheegay in xukuumaddiisu doonayso inay dhisto hay’ado garsoor oo ay bulshadu ku kalsoon tahay.

Hoggaamiyaha ayaa sheegay in amniga iyo caddaaladdu ay isku xiran yihiin, isla markaana helitaanka garsoor lagu kalsoon yahay uu muhiim u yahay xoojinta xiriirka dowladda iyo shacabka. Waxa uu intaas ku daray in dib-u-habaynta garsoorku ay ka mid tahay hawlaha ay xukuumaddiisu waddo, isaga oo xusay in guddiyo loo saaray qiimaynta iyo diyaarinta tallaabooyinka lagu dhisayo hay’adaha garsoorka.

Hadallada Hoggaamiyaha Koonfur Galbeed ayaa ku soo beegmaya xilli deegaannada maamulka ay dhawaan ka dhaceen dagaallo u dhexeeya ciidamada dowladda iyo xoogag taageersan madaxweynihii hore ee maamulka, Cabdicasiis Xasan Maxamed (Laftagareen), kuwaas oo bishii Oktoobar la wareegay gacan ku haynta degmooyin ka tirsan gobolka Bay, oo ay ku jiraan Buurhakaba iyo Bardaale.