Golaha Shacabka: Maqnaanshihii Fadhiyada oo Hadda Mushaar Lagu Waayayo

Toddoba maalmood bishii, kiiska waxaa loo gudbinayaa Guddiga Anshaxa, waxaana mushaarka bishaas laga jarayaa shan meelood meel.

Xildhibaan kasta wuxuu bishii qaataa 5,240 dollar. Shan meelood meel taas waa 1,048 dollar, waana lacagta haatan laga jaray xildhibaanada qaar.

Xeerku wuxuu sidoo kale xiray albaabkii looga baxsan jiray: xildhibaanka yimaada, magaciisa qorta, kadibna iska baxa fadhiga oo socda, waxaa lagu xisaabinayaa maqane.

Guddoomiyaha: “Labadaas uun baa mushaar la siin doonaa”

Guddoomiyaha Golaha Shacabka, Cabduqaadir Maxamed Nuur, ayaa xildhibaanada si cad ugu sheegay inuusan oggolaan doonin in xildhibaan qaar ay fadhiga yimaadaan iyagoo xanuunsan, halka kuwo kale ay gurigooda iska joogaan, labaduba isku mushaar qaataanna.

“Haddii xitaa laba xildhibaan oo keliya ay yimaadaan, labadaas uun baa mushaar la siin doonaa.” ayuu yiri Guddoomiyaha Golaha Shacabka

Kulamo kooram la’aan u baaqay

Go’aankan wuxuu yimid xilli kulamo badan oo Golaha ay baaqdeen, maadaama xildhibaanada fadhiga yimid aysan gaarin kooramka. Si kulan u furmo waxaa loo baahan yahay in ka badan 140 xildhibaan, halka xeer-hoosaadku uu fasax mar keliya u oggol yahay 30 xildhibaan oo keliya. Taas macnaheedu waa in marka kulan kooram la’aan u baaqdo, in ka badan 100 xildhibaan ay maqan yihiin iyagoo aan fasax haysan.

Xildhibaanada go’aanka ku qanacsanayn waxay xaq u leeyihiin inay racfaan ka qaataan muddo 15 maalmood ah, ama arrinta u keenaan golaha weyn si looga doodo.