Muqdisho (Dawan)– Golaha Shacabka ee Baarlamaanka Federaalka Soomaaliya ayaa shalay Akhrinta Koowaad marsiiyay heshiis ku saabsan iskaashiga iyo horumarinta macdanta Afrika, sida ay sheegtay Wasaaradda Batroolka iyo Khayraadka Macdanta Soomaaliya.
Heshiiskan oo Golaha Shacabka loo gudbiyay waxaa kulanka ku matalayay Wasiir Ku-xigeenka Wasaaradda Batroolka iyo Khayraadka Macdanta, Cabdiwahab Aadan Cananuug, kaas oo heshiiska horgeeyay Baarlamaanka si loo maro hannaanka dastuuriga ah ee ansixinta heshiisyada.
Axdiga Dhismaha Kooxda Istiraatiijiyadda Macdanta Afrika iyo Iskaashiga Horumarinta Macdanta Muhiimka ah ayaa qeyb ka ah dadaallada lagu xoojinayo wada-shaqeynta dalalka Afrika ee dhinaca khayraadka dabiiciga ah, iyadoo diiradda la saarayo iskaashi farsamo, aqoon-is-weydaarsi iyo kobcinta fursadaha maalgashi.
