Muqdisho (Dawan) — Golaha Shacabka Baarlamaanka Federaalka Soomaaliya ayaa ansixiyey Hindise-sharciyeedka Dembiyada Kufsiga iyo Anshax-xumada, kaas oo muddo dheer horyaallay Golaha, sida ay sheegtay Wasaaradda Qoyska iyo Horumarinta Xuquuqul Insaanka Xukuumadda Federaalka Soomaaliya.
Wasiirka Wasaaradda Qoyska iyo Horumarinta Xuquuqul Insaanka, Khadiija Maxamed Al-Makhzoumi, ayaa uga mahadcelisay guddoonka iyo xildhibaannada Golaha Shacabka ansixinta hindise-sharciyeedka, iyadoo bogaadisay doorkii ay ka qaateen geeddi-socodka sharci-dejinta.
Wasiirka ayaa sheegtay in hindise-sharciyeedkani uu soo maray marxalado kala duwan, isla markaana uu muddo dheer horyaallay Golaha Shacabka, iyadoo xustay in xildhibaannadu ay guteen waajibaadkooda dastuuriga ah.
Khadiija Al-Makhzoumi ayaa ansixinta hindise-sharciyeedka ku tilmaantay tallaabo muhiim ah oo lagu xoojinayo ilaalinta karaamada aadanaha, badqabka bulshada iyo xuquuqda dadka dhibbanayaasha u ah tacaddiyada. Waxay sheegtay in tallaabadani ay muhiim u tahay horumarinta helitaanka caddaaladda, gaar ahaan haweenka, carruurta iyo dadka kale ee nugul ee la kulma tacaddiyada.
