Muqdisho (Dawan) — Golaha Wasiirrada Xukuumadda Federaalka Soomaaliya ayaa ansixiyay qorshe qaran oo lagu xoojinayo u diyaar-garowga iyo ka jawaabista khataraha ka dhalan kara roobabka la xiriira ifafaalaha cimilada ee Super El Niño.
Kulanka toddobaadlaha ah ee Golaha Wasiirrada oo uu guddoomiyay Ra’iisul Wasaaraha Xukuumadda Federaalka Soomaaliya, Xamsa Cabdi Barre, ayaa lagu soo bandhigay warbixin ay diyaariyeen Wasaaradda Beeraha iyo Waraabka, iyadoo kaashanaysa Hay’adda Maareynta Musiibooyinka Soomaaliyeed (SoDMA), taas oo ka hadlaysa saameynta suurtagalka ah ee roobabka culus ee la filayo.
Warbixinta ayaa tilmaantay in Soomaaliya ay wajihi karto fatahaado, daadad xooggan iyo barakac, kuwaas oo saameyn ku yeelan kara wax-soo-saarka beeraha, xoolaha, hab-nololeedka bulshada iyo sugnaanta cunnada dalka.
