Muqdisho (Dawan) — Golaha Wasiirrada Xukuumadda Federaalka Soomaaliya ayaa ansixiyay heshiis is-afgarad oo u dhexeeya Soomaaliya iyo Jamhuuriyadda Carabta ee Masar, kaas oo lagu xoojinayo iskaashiga dhinacyada gaadiidka badda iyo horumarinta dekadaha.
Sida uu sheegay Xafiiska Ra’iisul Wasaaraha, heshiiskan ayaa u dhexeeya Wasaaradda Gaadiidka ee Masar iyo Wasaaradda Dekadaha iyo Gaadiidka Badda Soomaaliya, waxaana uu diiradda saaraya horumarinta dekadaha, is-weydaarsiga khibradaha farsamo iyo kobcinta awoodda hay’adaha ka shaqeeya waaxda badda.
Wasiirka Dekadaha iyo Gaadiidka Badda Soomaaliya ayaa uga mahadceliyay Golaha Wasiirrada ansixinta heshiiskan, isagoo sheegay in uu gacan ka geysan doono horumarinta kaabeyaasha dhaqaalaha dalka iyo xoojinta iskaashiga caalamiga ah ee dhinaca gaadiidka badda.
Heshiiska ayaa la filayaa inuu taageero wada-shaqeynta labada dal ee horumarinta dekadaha, tayeynta adeegyada gaadiidka badda, wadaagga aqoonta farsamo iyo la jaanqaadidda heerarka caalamiga ah ee waaxda badaha.
