Muqdisho (Dawan) – Golaha Wasiirrada Xukuumadda Federaalka Soomaaliya ayaa Khamiistan si adag u cambaareeyay booqashada Madaxweynaha Somaliland, Cabdiraxmaan Maxamed Cabdullaahi (Cirro), uu ku tagay Israa’iil, sida lagu sheegay war-saxaafadeed ka soo baxay Xafiiska Ra’iisul Wasaaraha.
Golaha Wasiirrada ayaa sheegay in booqashada Madaxweynaha Somaliland ee dhulka Falastiiniyiinta ee ay Israa’iil maamusho ay si cad uga hor imaanayso Dastuurka Jamhuuriyadda Federaalka Soomaaliya, sharciga caalamiga ah iyo mabaadi’da ku qotoma dhowrista madax-bannaanida dalalka.
Dowladda Federaalka Soomaaliya ayaa hore u sheegtay in xiriir siyaasadeed ama diblomaasiyadeed oo lala yeesho Somaliland, iyadoo laga tallaabsanayo Muqdisho, uu yahay xadgudub ku ah madax-bannaanida, midnimada iyo wadajirka dhuleed ee dalka.
Dhanka kale, Somaliland ayaa sheegtay inay Israa’iil la yeelatay xiriir diblomaasiyadeed oo cusub, ayna ka furatay Qudus safaarad, kadib booqashadii Madaxweynaha Somaliland ee Israa’iil.
