Goorma ayaa la dooranaya Guddoonka Wakiilada iyo Hoggaamiyaha Koonfur Galbeed?

Baydhabo (Dawan) – Guddiga Madaxa-Bannaan ee Doorashooyinka Qaranka iyo Soohdimaha Soomaaliya ayaa shalay shaaciyey jadwalka guud ee doorashada Guddoonka Golaha Wakiillada iyo Hoggaamiyaha Dawlad-Goboleedka Koonfur Galbeed, iyadoo la raacayo nidaam waafaqsan sharciga doorashooyinka qaranka, sida lagu muujiyey jadwalka rasmiga ah ee guddiga:

Doorashada Golaha Wakiillada:

Shaacinta liiska xubnaha: 25 May
Diyaargarowga xubnaha dooranaya: 26–29 May
Dhaarinta xildhibaannada: 30 May
Qabashada araajida musharixiinta Guddoomiyaasha iyo Ku-xigeenada: 31 May
Shaacinta liiska musharixiinta: 1 June
Hadal-jeedinta musharixiinta iyo doorashada Guddoonka: 2 June

Doorashada Hoggaamiyaha Dawlad-Goboleedka:

Qabashada araajida musharixiinta: 4–6 June
Shaacinta liiska musharixiinta: 7 June
Hadal-jeedinta musharixiinta: 8 June
Doorashada Hoggaamiyaha: 10 June

Guddiga ayaa caddeeyey in jadwalkan uu qeyb ka yahay qorshaha doorasho ee loo dejiyey in doorashadu u dhacdo si habsami leh, iyadoo la hubinayo in dhammaan xubnaha Golaha Wakiillada iyo musharaxiinta Hoggaamiyaha ay helaan fursad siman oo ay ku gutaan waajibaadkooda codbixineed.

Sidoo kale, guddiga ayaa ku booriyey musharixiinta iyo xildhibaannada inay raacaan habraacyada doorashada iyo xeerarka anshaxa, si loo xaqiijiyo doorasho xor iyo xalaal ah oo lagu kalsoonaan karo.