Muqdisho (Dawan) – Soomaaliya ayaa sheegtay in heerka dhimashada hooyadu uu hoos u dhacay, iyadoo uu ka soo degay 692 una dhacay 563 halkii 100,000 oo dhalasho, sida uu sheegay Wasiirka Caafimaadka iyo Daryeelka Bulshada, Dr. Cali Xaaji Aadan.
Wasiirka ayaa Miizaan Podcast oo ka baxa Dawan Media u sheegay in mashaariicda ay wasaaraddu maamusho ay sanadihii la soo dhaafay adeegyada caafimaadka gaarsiiyeen deegaanno badan oo aanay hore u gaarin, isla markaana ay adeegyo caafimaad u fidiyeen boqollaal kun oo hooyooyin iyo carruur ah. Wuxuu sheegay in heerka helitaanka adeegyada caafimaadka aasaasiga ah uu ka kacay 40% oo uu gaaray in ka badan 65%, halka heerka tallaalku uu ka kordhay 42% una gaaray 70%.
“Dhimashada hooyada oo markii hore ahayd 692 halkii 100,000 oo dhalasho ayaa hadda gaartay 563, taas oo muujinaysa hoos-u-dhac,” ayuu yiri.
Dr. Cali Xaaji ayaa sidoo kale sheegay in dalka laga howlgeliyay boqollaal xarumood oo caafimaad, isla markaana la shaqaaleysiiyay ilaa 8,500 oo shaqaale caafimaad ah. Tirada 692 waxay ku salaysan tahay Sahanka Caafimaadka iyo Tirakoobka Soomaaliya (SHDS) ee 2020, halka tirada 563 ay tahay qiyaasta caalamiga ah ee sannadka 2023.