Baydhabo (Dawan) – Guddiga Madaxa-bannaan ee Doorashooyinka Qaranka iyo Soohdimaha Soomaaliya ayaa sheegay in natiijooyinka hordhaca ah ee doorashooyinka isku sidkan ee Dowlad Goboleedka Koonfur Galbeed lagu dhawaaqi doono 24 saacadood gudahood, kadib marka la soo gabagabeeyo hubinta iyo isu-geynta codadka.
Guddoomiyaha Guddiga Doorashooyinka Qaranka ayaa sheegay in geeddi-socodka tirinta, gudbinta iyo hubinta natiijooyinka doorashada uu si habsami leh u socdo, iyadoo howlahaasi loo fulinayo si waafaqsan sharciga doorashooyinka qaranka.
“Guddigu wuxuu gacanta ku hayaa howlaha hubinta iyo iswaafajinta natiijooyinka goobaha codbixinta,” ayuu yiri Guddoomiyaha Guddiga Doorashooyinka.
Guddoomiyaha ayaa sheegay in tirinta codadka goobaha codbixinta si rasmi ah loo soo gabagabeeyay habeenkii Isniinta saqdii dhexe, isla markaana agabkii doorashada si nabadgelyo leh loogu soo xareeyay xafiisyada degmooyinka guddiga saakay aroortii.
Waxa uu sidoo kale sheegay in dhammaan natiijooyinka goobaha codbixinta loo soo gudbiyay si waafaqsan habraacyada iyo qodobbada sharciga doorashooyinka qaranka.
