Muqdisho (Dawan) – Wasaaradda Waxbarashada, Hiddaha iyo Tacliinta Sare ee Soomaaliya ayaa si rasmi ah u shaacisay in imtixaanka shahaadiga ah ee dugsiyada sare ee fasalka 12-aad loo fadhiisan doono 20-ka Juun 2026, iyadoo imtixaanku socon doono illaa 25-ka Juun 2026.
Qoraal ay wasaaraddu ku baahisay baraha bulshada ayaa lagu wargeliyay ardayda, macallimiinta, waalidiinta iyo maamulayaasha dugsiyada in la guda geli doono Imtixaanka Qaranka ee sanadkan, kaas oo ay u fariisan doonaan kumannaan arday oo ku kala sugan gobollada dalka.
“Wasaaradda Waxbarashada, Hiddaha iyo Tacliinta Sare waxa ay la wadaageysaa ardayda, macallimiinta, maamuleyaasha, waalidiinta iyo dhammaan bahda waxbarashada in Imtixaanka Qaranka sannadkan la geli doono 20-ka Juun ilaa 25-ka Juun 2026,” ayaa lagu yiri ogeysiiska wasaaradda.
