Guddiga Doorashooyinka oo shaaciyay natiijada doorashada Hirshabeelle

Jowhar (Dawan) — Guddiga Madaxa Bannaan ee Doorashooyinka Qaranka ayaa shaaciyay natiijada doorashada Golaha Wakiillada Hirshabeelle, taas oo ka dhacday 10 degmo, waxaana ku tartamay 13 urur siyaasadeed, iyadoo 99 kursi loo tartamay, sida uu sheegay Guddiga Madaxa Bannaan ee Doorashooyinka Qaranka.

Guddigu wuxuu sheegay in doorashada Golaha Wakiillada ay ka qeyb galeen 114,633 qof, kuwaas oo 112,451 cod loo aqoonsaday kuwo ansax ah, halka 2,182 cod ay noqdeen kuwo aan ansax ahayn.

Ururka Caddaaladda iyo Wadajir ayaa helay codadka ugu badan, oo gaaraya 88,300 cod, wuxuuna ku guuleystay 78 kursi oo Golaha Wakiillada ah.

Ururka Karaama ayaa helay 6,875 cod iyo 6 kursi, halka Iftin Qaran uu helay 6,165 cod iyo 5 kursi.

SINCAD ayaa helay 3,701 cod iyo 3 kursi, halka Dimoqraadiga Soomaaliyeed uu helay 2,368 cod iyo 2 kursi.

Ururka RAMAAS ayaa helay 1,939 cod iyo 2 kursi, halka Caddaaladda iyo Midnimada (TIIR), MADALSAN iyo Muwaadiniinta Soomaaliyeed ay midkiiba heleen hal kursi.

Ururrada Dadka Soomaaliyeed, SAAB, Dan Shacab iyo Dhalinyarada Tala Qaran ayaan wax kursi ah ka helin Golaha Wakiillada, sida uu Guddigu ku dhawaaqay.

Dhanka kale, Guddiga ayaa soo bandhigay natiijada doorashada golayaasha deegaanka Hirshabeelle, oo sidoo kale ka dhacday 10 degmo, iyadoo 222 kursi loo tartamay.

Tirada dadka codeeyay doorashada golayaasha deegaanka ayaa ahayd 114,633, waxaana ansaxay 112,466 cod, halka 2,167 cod ay noqdeen kuwo aan ansax ahayn.

Ururka Caddaaladda iyo Wadajir ayaa helay 158 kursi oo golayaasha deegaanka ah, halka KARAAMA uu helay 17 kursi, MADALSAN 14 kursi, Iftin Qaran 12 kursi, SINCAD 8 kursi, RAMAAS 7 kursi iyo Muwaadiniinta Soomaaliyeed 4 kursi.

Guddiga ayaa sheegay in doorashooyinka Hirshabeelle iyo Galmudug ee dhacay 30-kii Sebteembar ay yihiin tallaabo muhiim ah oo loo qaaday nidaamka doorashada qof iyo cod. Doorashada Hirshabeelle ayaa ahayd markii ugu horreysay ee shacabka si toos ah u doortaan Golaha Wakiillada iyo golayaasha deegaanka.

Guddiga Madaxa Bannaan ee Doorashooyinka Qaranka ayaa sheegay inuu hadda isu diyaarinayo hawlaha doorashooyinka federaalka, oo ay ku jiraan doorashada labada aqal ee Baarlamaanka Federaalka Soomaaliya.