Guddiga Xuquuqda Aadanaha oo ka hadlay colaadaha Sool iyo Hiiraan

Muqdisho (Dawan) – Guddiga Madaxa-bannaan ee Xuquuqul Insaanka Qaranka Soomaaliyeed (GMXIQ) ayaa si kulul u cambaareeyay dilalka dadka rayidka ah ee ka dhacay deegaanka Ari-Caddeeye ee gobolka Sool iyo degmada Jalalaqsi ee gobolka Hiiraan.

Guddiga ayaa falalkaasi ku tilmaamay kuwo si weyn u dhaawacaya xuquuqda aadanaha, isla markaana sii hurinaya xaaladda amni ee dalka.

War-saxaafadeed ka soo baxay guddiga ayaa lagu sheegay in ugu yaraan 21 qof oo rayid ah, oo ay ku jiraan carruur iyo dad waayeel ah, lagu dilay weerar ka dhacay Ari-Caddeeye, halka ugu yaraan 10 qof ay ku dhinteen rabshado ka dhacay Jalalaqsi, kuwaas oo sidoo kale lagu gubay guryo ay lahaayeen dad rayid ah.

Guddiga ayaa muujiyay walaac xooggan oo ku saabsan beegsiga dadka rayidka ah, burburinta hantida, barakaca qoysaska iyo saameynta bani’aadannimo ee ka dhalatay rabshadaha, isagoo sheegay in falalkaasi u baahan yihiin in si degdeg ah wax looga qabto.

Guddigu wuxuu sheegay inuu si dhow ula socday xaaladaha ka taagan Ari-Caddeeye iyo Jalalaqsi, isla markaana uu sameeyay qiimeyn hordhac ah oo ku saleysan xogaha la helay, iyadoo uu xusay in warbixintu tahay mid hordhac ah oo baaritaanno dheeraad ah ay socdaan.

Guddiga ayaa ugu baaqay dhammaan dhinacyada ku lugta leh colaadaha inay si degdeg ah u joojiyaan rabshadaha, muujiyaan is-xakameyn, isla markaana ilaaliyaan dadka rayidka ah iyo hantidooda, iyagoo u hoggaansamaya Dastuurka Federaalka Soomaaliya, shuruucda caalamiga ah ee xuquuqda aadanaha iyo xeerarka bani’aadannimada.

“Waxaan ugu baaqeynaa dhammaan dhinacyada inay si degdeg ah u joojiyaan colaadaha, muujiyaan is-xakameyn, isla markaana ilaaliyaan dadka rayidka ah iyo hantidooda,” ayaa lagu yiri war-saxaafadeedka guddiga.

Bayaankan ayaa yimid kaddib markii 20-kii iyo 22-kii bishan ay dagaallo u dhexeeyay beelo walaalo ah ka kala dhaceen deegaanka Ari-Caddeeye ee gobolka Sool iyo degmada Jalalaqsi ee gobolka Hiiraan, kuwaas oo sababay khasaare isugu jira dhimasho, dhaawac, barakac iyo burbur hanti.