Muqdisho (Dawan) — Guddiga Madaxa-bannaan ee Xuquuqul Insaanka Soomaaliya, Barnaamijka Horumarinta Qaramada Midoobay (UNDP) iyo Shabakadda Carabta ee Hay’adaha Qaranka ee Xuquuqul Insaanka (ANNHRI) ayaa Isniintii Muqdisho ka bilaabay aqoon-is-weydaarsi saddex maalmood ah, sida lagu sheegay bayaan ka soo baxay guddiga.
Aqoon-is-weydaarsigu wuxuu diiradda saarayaa Mabaadii’da Paris, xeerarka iyo mabaadii’da xuquuqul insaanka, heshiisyada caalamiga ah iyo habraacyadooda, iyo sidoo kale qaabilaadda iyo maaraynta cabashooyinka, baarista xadgudubyada xuquuqul insaanka, kormeerka xabsiyada iyo goobaha dadka lagu hayo, iyo diiwaangelinta dhacdooyinka la xiriira xuquuqul insaanka.
Guddoomiyaha Guddiga, Dr. Maryan Qasim Axmed, ayaa UNDP iyo ANNHRI uga mahadcelisay taageerada iyo iskaashiga ay ka geysteen qabanqaabada aqoon-is-weydaarsiga. Munaasabadda furitaanka waxaa sidoo kale ka hadlay Sultan Bin Hassan Aljamali, Xoghayaha Guud ee ANNHRI ahna xubin ka tirsan Guddiga Qaranka ee Xuquuqul Insaanka Qatar, iyo Evariste Sibomana, Madaxa Barnaamijyada Maamulka ee UNDP Soomaaliya.
