Muqdisho (Dawan)– Guddoomiyaha Maamulka Gobolka Banaadir ahna Duqa Muqdisho, Xasan Maxamed Xuseen Muungaab, ayaa maanta dhagax-dhigay mashaariic adeegyo bulsho oo laga hirgelinayo Waaxda Xaaji Cabdi ee degmada Gubadley, kuwaas oo loogu talagalay qoysaska dib-u-dejinta ee ay saameeyeen howlaha horumarinta caasimadda, sida uu sheegay Gobolka Banaadir.
Mashaariicdan ayaa ka kooban suuq, masaajid, xarun waaxeed iyo Rugta Caafimaadka Hooyada iyo Dhallaanka (MCH), iyadoo sidoo kale la bilaabayo diyaarinta adeegyada biyaha iyo korontada ee deegaanka cusub.
Dhagax-dhiggan ayaa daba socda qorshihii hore ee Maamulka Gobolka Banaadir uu ku sheegay in dhul loo qoondeeyay qoysaska ay saameeyeen waddo-furista iyo horumarinta kaabayaasha Muqdisho, kuwaas oo dib-u-dejin loogu sameynayo deegaanka Xaaji Cabdi.
