Nairobi (Dawan)- Guddoomiyaha Gobolka Wajeer ee dalka Kenya, Axmed Cabdullaahi, ayaa beeraleyda ugu baaqay inay Madaxweyne William Ruto mar kale u codeeyaan doorashada sanadka soo socda, isaga oo ku sababeeyay baaqiisa horumarka uu sheegay in la sameeyay intii uu xilka hayay.
Guddoomiyaha ayaa hadalkan ka sheegay shirweynaha Isbeddelka Nidaamka Beeraha iyo Cuntada oo ka socda magaalada Nairobi, halkaas oo uu Madaxweynaha Kenya William Ruto kaga qaybgalayay maalintii labaad.
Axmed Cabdullaahi ayaa soo bandhigay tirokoobyo uu sheegay inay muujinayaan horumarka laga sameeyay wax-soo-saarka iyo taageerada beeraleyda. Wuxuu sheegay in qiimaha bunka uu kordhay, isagoo ka soo kacay 50 shilin halkii kiiloogaraam isla markaana uu kordhay 150 shilin.
Sidoo kale, wuxuu sheegay in afartii sano ee lasoo dhaafay la qaybiyay 34.4 milyan oo kiish oo bacrimin ah oo la kabay, halka 8.6 milyan oo beeraley ah markii ugu horreysay lagu diiwaangeliyay Nidaamka Isku-dhafan ee Maareynta Macluumaadka Beeraha Kenya (KEMIS).
Dhanka xoolaha, guddoomiyuhu wuxuu sheegay in la sameeyay Hay’adda Suuq-geynta Xoolaha, isla markaana 7.9 milyan oo xoolo ah laga tallaalay cudurrada. Waxa kale oo uu sheegay in 323,800 qoys oo xoolo-dhaqato ah lagu daray barnaamijka caymiska xoolaha ee ku salaysan xaaladaha cimilada, kuwaas oo magdhow helay xilliyadii ay abaaruhu dhaceen.
