Gursum, 21 October 2025 (Dawan) — Degmada Gursum ee Dawlad-Deegaanka Soomaalida Itoobiya ayaa shalay si rasmi ah u daahfurtay nidaamka casriga ah ee dakhli ururinta dijitaalka ah, ee Loo yaqaano E-tax, kaas oo lagu beddelayo habkii hore ee gacanta lagu maamuli jiray.
Xaruntaan ayaa waxaa xarigga ka jaray Wasiir-ku-xigeenka Xafiiska Dakhliga Dawlad-Deegaanka Soomaalida, Cabdiwaaxid Cabdi Qorane, oo uu wehelinayay Guddoomiyaha Degmada Gursum, Cabdirisaaq, iyadoo lagu sheegay in nidaamkan cusub uu yahay mid kor u qaadaya hufnaanta, isla markaana yareynaya musuqmaasuqa iyo lunsiga hantida dadweynaha.
Wasiir-ku-xigeenka ayaa sheegay in nidaamkan cusub uu qayb ka yahay istiraatiijiyadda guud ee Xafiiska Dakhliga Dawlad-Deegaanka Soomaalida ee lagu dhisayo nidaam daahfuran oo waafaqsan teknoolojiyadda casriga ah, si loo hubiyo in dakhliga gudaha si caddaalad ah loo ururiyo.
“Waxaan ka guurnay nidaamkii hore ee gacanta lagu maamuli jiray, waxaan u guurnay nidaam dijitaal ah oo toos u diiwaangelinaya ganacsatada, kana fog musuqmaasuq iyo lunsasho dhaqliga ah,” ayuu yiri Cabdiwaaxid.
Nidaamka cusub ee “E-Tax System” ayaa u fududeynaya ganacsatada iyo canshuur bixiyeyaasha degmada Gursum inay si toos ah ugu bixiyaan cashuurtooda, iyadoo lacagta si ammaan ah ugu dhacaysa akoontiyada bangiyada dowladda. Arrintan ayaa meesha ka saaraysa baahida in qof si toos ah lacag u bixiyo, taas oo hoos u dhigaysa faragelinta gacanta iyo musuqmaasuqa.
Guddoomiyaha degmada Gursum, Cabdirisaaq, ayaa sheegay in nidaamkan uu kor u qaadi doono dakhliga degmada, isla markaana uu fududeyn doono bixinta adeegyada bulshada sida caafimaadka, biyaha iyo waxbarashada.
“Tani waa tallaabo weyn oo lagu xaqiijinayo in bulshada Gursum ay helaan adeegyo tayo leh oo u fududeynaya in canshuuraha ay si fudud u bixiyaan taas lagu maalgalinayo adeegyada aasaasiga ah sida waxbarashada iyo caafimaadka.” ayuu yiri Guddoomiyaha.
Nidaamkan cusub ayaa qeyb ka ah dadaallada xukuumadda iyo Xisbiga Barwaaqo, ay ku doonayaan in daahfurnaanta dhaqli aruurinta wax looga qabto, taas oo ay isla qireen maamulka degmada Gurum in ay jireen musuqmaasuq baahsan oo ka dhex jiray Nidaamki hore ee canshuuraha ay ku bixin jireen ganacsatada deegaanka.