Jowhar (Dawan) – Madaxweynaha Dowlad Goboleedka Hirshabeelle, Cali Cabdullaahi Xuseen (Cali Guudlaawe), ayaa sheegay in maamulka uu diyaar u yahay inuu dhageysto oo kala hadlo cid kasta oo tabasho ka qabta qaab dhismeedka Hirshabeelle, isaga oo ku dooday in bulshada inteeda badan ay taageersan tahay jiritaanka maamulka.
Wareysi gaar ah oo uu siiyay barnaamijka Miizaan Podcast ee ka baxa Dawan Media, ayuu madaxweynuhu ku sheegay in siyaasiyiin badan ay mudnaanta siiyaan danahooda gaarka ah, halka shacabka intiisa badan ay ku qanacsan yihiin dowlad-goboleedka Hirshabeelle.
“Siyaasadda guud ahaan dadka lama wada qancin karo, laakiin bulshada inteeda badan qanaaco ayay ku qabtaa wixii ay shalay dhisteen oo ah Dowladda Hirshabeelle,” ayuu yiri Cali Guudlaawe.
Madaxweynaha ayaa tusaale u soo qaatay in adeegyada maamulka iyo hay'adaha dowlad goboleedku ay ka howlgalaan dhammaan degmooyinka Hirshabeelle, isla markaana mas'uuliyiinta uu magacaabay maamulku ay ka shaqeeyaan heer gobol iyo heer degmo.
“Haddii ay heer gobol tahay ama heer degmo tahay, guud ahaan waxaa ka shaqeeya mas'uuliyiintii ay magacaawday Hirshabeelle,” ayuu sheegay.
Cali Guudlaawe wuxuu sidoo kale sheegay in bulshada Hirshabeelle ay hore ugu heshiisay qaab-dhismeedka maamulka, isagoo carrabka ku adkeeyay in albaabku u furan yahay cid kasta oo qabta tabasho.
