Hadal-hayn ka dhalatay Fiqi oo Al-Shabaab ku tilmaamay “xisbi”

Ceeldheer (Dawan) – Wasiirka Gaashaandhigga Soomaaliya, Axmed Macallin Fiqi, ayaa sheegay in Al-Shabaab ay tahay “xisbi” dalka kula loolamaya Xisbiga Caddaaladda iyo Wadajirka (JSP), xilli uu khudbad ka jeedinayay degmada Ceeldheer ee gobolka Galgaduud, Isniintii.

Fiqi ayaa sheegay in labada dhinac ee sida tooska ah ugu loolamaya masiirka dalka ay kala yihiin Al-Shabaab, oo uu ugu yeeray “xisbi”, iyo Xisbiga Caddaaladda iyo Wadajirka (JSP), oo ah xisbiga talada haya.

“Laba xisbi oo isku haya dalkaan waa xisbiga Al-Shabaab iyo xisbiga JSP. Inta kale rooti waaye,” ayuu yiri Wasiirka Gaashaandhigga, isagoo hadalkan ka jeediyay deegaanka Hul-Caduur oo hoostaga degmada Ceeldheer.

Hadalka Wasiirka ayaa si weyn loogu faafiyay baraha bulshada, waxaana ka dhashay falcelinno kala duwan. Qaar ka mid ah dadka ka falceliyay ayaa u fasirtay in adeegsiga erayga “xisbi” uu u muuqdo mid Al-Shabaab uga leexinaya sifada urur argagixiso, halka kuwo kalena ay ku doodeen in Wasiirku ula jeeday in Al-Shabaab iyo JSP ay yihiin labada awoodood ee ugu waaweyn ee siyaasadda iyo amniga dalka saamaynta ku leh, isagoo isla markaana yareynaya doorka axsaabta kale ee siyaasadeed.

Qaar kale oo ka mid ah dadka falceliyay ayaa sheegay in hadalka Wasiirka uu u muuqdo mid yasaya axsaabta kale ee dalka ka jira, isla markaana uu muujinayo dabacsanaan ku wajahan Al-Shabaab. Ilaa iyo hadda, Wasiirka Gaashaandhigga ama Wasaaradda Gaashaandhigga kama aysan soo saarin wax faahfaahin ah oo ku saabsan hadalkaas iyo ujeeddada laga lahaa.