Muqdisho (Dawan) – Mashruuca muddada dheer la sugayay ee daabacaadda iyo soo saarista lacagta cusub ee Shillin Soomaaliga ayaa maraya heer gabagabo ah, kaddib sannado badan oo diyaargarow sharci, maaliyadeed iyo farsamo ah, sida ay Dawan u sheegeen mas’uuliyiin sare oo ka tirsan Dowladda Federaalka Soomaaliya iyo Bangiga Dhexe.
Wasiirka Maaliyadda Soomaaliya, Biixi Iimaan Cige, ayaa sheegay in dowladda ay horumar la taaban karo ka sameysay diyaarinta siyaasadda lacagta, dib-u-eegista sharciga Bangiga Dhexe, dejinta qorshayaasha farsamo iyo saadka, iyo raadinta maalgelinta mashruuca.
Wuxuu xusay in qorshaha faahfaahsan ee hirgelinta mashruuca la shaacin doono marka la soo gabagabeeyo dhammaan diyaar-garowga lagama maarmaanka u ah soo saarista lacagta cusub.
Guddoomiye Ku-xigeenka Bangiga Dhexe ee Soomaaliya, Cali Yaasiin, ayaa sheegay in diyaarinta mashruucan ay socotay ku dhowaad siddeed sano, isagoo tilmaamay in hirgelintiisa dalka oo dhan ay u baahan doonto in ka badan $70 milyan si loogu maalgeliyo daabacaadda lacagta, dib-u-furista laamaha Bangiga Dhexe, gaarsiinta lacagta gobollada iyo dhismaha nidaamyo ammaan oo lagu kaydiyo laguna qaybiyo lacagta cusub.
