Hantidhowrka oo kashifay khaladaad maamul iyo hubanti la’aan ku saabsan $42.2 Milyan oo Dowladda ka heshay Favori iyo Albayrak

“Sanadkii 2025, dowladda Soomaaliya waxay ka heshay Favori iyo Albayrak heshiiska dheef-wadaagga ah dakhli wadartiisu tahay $42,235,735.14, balse aan si buuxda loo xaqiijin karin saxnaanta dakhligaas, gaar ahaan sabab la xiriirta warbixin maaliyadeed...” ayuu yiri Axmed Ciise, Hantidhowraha Guud ee Qaranka.

Warbixintu waxay sidoo kale sheegtay in 19 shaqaale loo howlgeliyay diblomaasiyadda iyagoo aan qaadan tababarkii loo baahnaa, halka 14 diblomaasi dibadda loo diray iyadoo aan si buuxda loo raacin shuruudihii iyo habraacyadii looga baahnaa.

Dhanka kale, Hantidhowrka ayaa sheegay in 7 nidaam oo dakhliga dowladda ah aysan wali si buuxda ugu xirnayn SFMIS, taas oo uu sheegay inay abuuri karto khataro la xiriira diiwaangelinta, la socodka iyo maareynta dakhliga dowladda.

Hantidhowrka Guud ayaa hay’adaha dowladda ugu baaqay inay xoojiyaan hufnaanta, isla-xisaabtanka iyo u hoggaansanaanta sharciga, isla markaana ay si dhab ah u fuliyaan talooyinka kasoo baxa baaritaannada.