Muqdisho (Dawan) – Hawlgalka Taageerada iyo Xasilinta Midowga Afrika ee Soomaaliya (AUSSOM) ayaa Isniinta maanta ah dib u xaqiijiyay ballanqaadkiisa muddada dheer ee ku aaddan taageeridda kala-guurka amniga dalka, isagoo ammaanay dhabar-adaygga shacabka Soomaaliyeed munaasabadda xuska Maalinta Afrika.
Nuqul ka mid ah bayaan rasmi ah oo laga soo saaray xuska munaasabaddan, ayuu Danjire El Hadji Ibrahima Diene, oo ah Ergeyga Gaarka ah ee Guddoomiyaha Guddiga Midowga Afrika isla markaana ah madaxa AUSSOM, ku adkeeyay in qaaraddu ay weli u taagan tahay garab istaagga hannaanka dowlad-dhisidda iyo soo-kabashada Soomaaliya.
"AUSSOM, iyadoo si dhow ula shaqaynaysa Dawladda Federaalka Soomaaliya, waxay weli ka go'an inay taageerto dadaallada ay horkacayso Soomaaliya ee lagu xoojinayo hay'adaha nabadgelyada, kor u qaadista xasilinta, ilaalinta bulshada, iyo abuurista xaalado horseedi kara nabad iyo horumar waara," ayuu yiri Diene.
