Soomaaliya, 19 Oct. 25 — Xafiiska Amniga Qaranka oo kaashanaya Wasaaradda Deegaanka iyo Isbeddelka Cimilada ayaa maanta Muqdisho ku qabtay tababar laba maalmood soconaya oo loogu talagalay saraakiil ka tirsan hay’adaha dowladda iyo wasaaradaha, kaas oo lagu falanqeynayo sida isbeddelka cimiladu u saameeyo amniga iyo xasilloonida dalka.
War-saxaafadeed lagu baahiyay Villa Somalia ayaa Ujeeddada tababarka ku sheegay in uu ahaa mid loowu talagahay in lagu fahmo xiriirka ka dhexeeya isbeddelka cimilada, nabadda iyo amniga, iyadoo lagu xoojinayo awoodda hay’adaha amniga si ay u qiimeeyaan una maareeyaan khataraha ka dhasha cimilada isbedel bedela.
Xafso Cumar Cabdullaahi, madaxa waaxda deegaanka iyo isbeddelka cimilada ee wasaaradda deegaanka, oo hadal ka jeedisay furitaanka tababarka, ayaa sheegtay in mas’uuliyad guud ay ka saaran tahay shacabka iyo dowladdaba ilaalinta deegaanka. Waxay hoosta ka xariiqday muhiimadda wacyigelinta iyo aqoon kororsiga hay’adaha dowladda, si ay uga hortagaan khataraha deegaanka iyo cimilada.
Dhankeeda, Khawla Abdirahman Ismaaciil, agaasimaha waaxda arrimaha maamul goboleedyada iyo gobolka Banaadir ee xafiiska amniga qaranka, ayaa sheegtay in tababarka uu qayb ka yahay qorshe lagu dhisayo iskaashi dhow oo u dhexeeya hay’adaha amniga iyo kuwa deegaanka, si loo yareeyo khilaafaadka ay sababaan isbeddelka cimilada loona dhiirrigeliyo ka-qaybgalka haweenka iyo dhalinyarada dhismaha nabadda.
Dagaallada sokeeye ee u dhexeeya qabaa’ilka, gaar ahaan kuwa salka ku haya dhul daaqsinka iyo kheyraadka dabiiciga ah, ayaa sidoo kale ka mid ah waxyaabaha ku leh saameynta tooska ah ee isbeddelka cimilada. Qaybaha abaarta iyo biyo yaraanta ayaa sababa tartan u dhexeeya beelaha xoolo dhaqatada ah, taasoo keenta isku dhac hubeysan iyo xasilooni darro amni.
Tababarkan ayaa qayb ka ah dadaallada dowladda federaalka ay ku dooneyso in ay ku xoojiso awoodda hay’adaha qaranka ee la qabsiga cimilada iyo sugidda amniga deegaanka.