Muqdisho (Dawan) – Hay’adda Qaxootiga iyo Barakacayaasha Qaranka Soomaaliya ayaa ka digtay saameynta ay dhimista maalgelinta gargaarka bani’aadannimo ku yeelan karto qaxootiga iyo dadka gudaha ku barakacay, iyadoo sheegtay in hoos u dhaca taageeradu uu saameyn ku yeeshay adeegyada muhiimka ah ee loo fidiyo dadka nugul.
Guddoomiyaha Hay’adda Qaxootiga iyo Barakacayaasha Qaranka, Liibaan Cabdi Cigaal, ayaa Muqdisho kulan kula yeeshay Jeremy Konyndyk, Madaxa Hay’adda Refugees International, iyo Cabdullaahi Boru Halakhe, U-doodaha Sare ee Bariga iyo Koonfurta Afrika ee hay’adda.
Kulanka ayaa looga hadlay xaaladda qaxootiga ku sugan Soomaaliya iyo dadka Soomaaliyeed ee gudaha ku barakacay, iyadoo si gaar ah diiradda loo saaray caqabadaha bani’aadannimo ee ka dhashay baahiyaha sii kordhaya iyo yaraanshaha taageerada.
Mas’uuliyiinta Refugees International ayaa Muqdisho u yimid inay qiimeeyaan saameynta ka dhalatay dhimista qaar ka mid ah maalgelintii iyo taageeradii bani’aadannimo ee loo fidin jiray dadka ay saameeyeen colaadaha, barakaca iyo xaaladaha adag ee nolosha.
