Muqdisho (Dawan) — Xisbiga mucaaradka ah ee Himilo Qaran ayaa Jimcihii ku baaqay in la qabto shirweyne qaran oo lagu dhiso dowlad loo dhan yahay haddii wadahadallada siyaasadeed ee socda ay ku dhammaadaan heshiis la’aan.
“Haddii wadahadallada socda ay fashilmaan, waxaa loo baahan yahay shirweyne qaran oo lagu dhiso dowlad loo dhan yahay, halkii awoodda lagu koobi lahaa koox siyaasadeed oo kooban,” ayuu xisbigu ku sheegay war-saxaafadeed.
Soo jeedinta ayaa qayb ka ahayd war-saxaafadeed ka koobnaa 12 bog oo Himilo Qaran soo saaray kadib shir laba maalmood socday oo xisbigu ku yeeshay Muqdisho 17-kii iyo 18-kii Sebtembar.
Xisbiga uu hoggaamiyo madaxweynihii hore Shariif Sheekh Axmed ayaa sheegay in xubnihiisa gudaha iyo dibadda ay kulanka kaga arrinsadeen xaaladaha siyaasadda, amniga, dhaqaalaha iyo bani’aadannimada ee Soomaaliya.
