Jowhar (Dawan) – Madaxweynaha Hirshabelle Cali Cabdullaahi Xuseen(Cali Guudlawe), ayaa sheegay in kharashka badan ee ku baxa gaadiidka sidaa agabka dhismaha uu xaddiday dhismaha gaarka loo leeyahay ee Jowhar, oo ah caasimadda dowlad-goboleedka, halkaas oo inta badan qalabka dhismaha laga keeno Muqdisho.
Isagoo wareysi siinayay barnaamijka Miizaan Podcast ee Dawan Media, Guudlawe ayaa sheegay in Jowhar ay ka maqan yihiin agabka muhiimka ah ee dhismaha sida dhagaxa, quruuruxa iyo ciidda dhismaha, taasoo ku khasbeysa qandaraasleyaasha iyo dadka deegaanka inay agabka ka keenaan masaafo qiyaastii 90 km u jirta.
Wuxuu sheegay in rarka hal Kaariko oo dhagax ah oo dhismaha ah uu ku kaco inta u dhaxeysa $1,500 ilaa $1,800 si uu u soo gaaro Jowhar, marka loo eego kharashka aadka u hooseeya ee meelaha si maxalli ah looga helo agabka dhismaha.
“Caqabaddu waxay tahay in agabka loo isticmaalo dhismaha laga keeno Muqdisho oo 90 km u jirta. Hal Kaariko oo dhagax ah wuxuu ku kacaa inta u dhaxeysa $1,500 iyo $1,800.” ayuu yiri Guudlawe.
Guudlawe ayaa sheegay in qiimaha sarreeya ee agabka uu gaabiyay dhismaha gaarka loo leeyahay, oo ay ku jiraan guryaha waaweyn ee la dego iyo dhismayaasha ganacsiga, marka loo eego caasimadaha kale ee dowlad-goboleedyada xubnaha ka ah dowladda federaalka.
