Nairobi - Madaxweynayaasha Soomaaliya, Kenya iyo raiisul wasaaraha Itoobiya ayaa lagu wadaa inay Axadda ku yeeshaan magaalada Nairobi, kulan saddex-geesood ah oo la filayo in lagu lafa-guro arrimo siyaasadeed iyo kuwo amni oo muhiim u ah gobolka, inkasta oo aan si rasmi ah loo shaacin ajendaha shirkan.
Saddexda hoggaamiye ayaa wajahaya doorashooyin madaxtinimo oo ku soo fool leh dalalkooda, taasoo sii kordhinaysa muhiimadda kulanka.
Sida ay tilmaamayaan ilo xog-ogaal ah, waxaa la filayaa in wada-hadalladu taaban doonaan xaaladda doorashooyinka Soomaaliya, Itoobiya iyo Kenya, iyo saameynta ay ku yeelan karaan xasilloonida guud ee gobolka.
Arrimaha Jubaland iyo xiriirka u dhexeeya dowlad-goboleedkaas iyo dowladda dhexe ee Soomaaliya ayaa sidoo kale ka mid ah qodobbada la saadaalinayo in miiska la saaro.
Tani waxay imaanaysaa xilli dhawaan la baajiyay shir ay mucaaradka Soomaaliya ku lahaayeen Nairobi, sababo aan si cad loo shaacin awgood, taas beddelkeedna ay doorteen inay Kismaayo ku yeeshaan kulan ay ku dhammaystireen dhismaha golaha loo bixiyay Mustaqbalka Soomaaliyeed, oo ay ku mideysan yihiin siyaasiyiin mucaarad ah, Jubaland iyo Puntland.
