Muqdisho (Dawan)- Jaamacadda Hormuud ayaa AI u dooratay mowduuca Toddobaadka Tababarka Qaranka 2026, iyadoo qorshaynaysa barnaamij lix maalmood ah oo lagu baranayo adeegsiga gaarad gacmeedka ee waxbarashada, ganacsiga, shaqo-abuurka iyo horumarinta bulshada.
Barnaamijka, oo soconaya 29-ka Agoosto ilaa 3-da Sebtembar, ayaa ka koobnaan doona 24 kulan oo tababar iyo aqoon-wadaag ah oo ay bixinayaan khubaro ku takhasustay teknoolajiyadda, waxbarashada, caafimaadka, ganacsiga, shaqo-abuurka iyo horumarinta bulshada, sida ay sheegtay Hormuud University.
Maxamed Cabdiraxmaan, Agaasimaha Waaxda Xirfadaha ee Jaamacadda Hormuud, ayaa Dawan u sheegay maanta isniiin ah in barnaamijka loogu talagalay in bulshada Soomaaliyeed la siiyo faham guud oo ku saabsan AI iyo sida loogu adeegsan karo shaqooyinka kala duwan.
“Waxaan ugu talagalnay inay bulshadu dhan oo dhan ay ka faa'iideysato barnaamijkan; cid walba oo danaynaysa, haba noqoto arday, macallimiin, ganacsatada ama dadka ka shaqeeya hay'adaha dowladda,” ayuu yiri Cabdiraxmaan.
Tababarrada ayaa diiradda saari doona fahamka aasaasiga ah ee AI, adeegsiga teknoolajiyadda ee waxbarashada iyo ganacsiga, iyo sida dhalinyarada qalin-jabisay ay ugu adeegsan karaan xirfadaha AI si ay ugu diyaar garoobaan suuqa shaqada.
Barnaamijka waxaa sidoo kale qayb ka noqon doona Hackathon, oo ah tartan ay kooxo xirfadlayaal ah ku adeegsanayaan aqoonta ay ka helaan tababarrada si ay xalal ugu sameeyaan dhibaatooyin jira.
