Howlgal ka dhacay Jubbada Hoose oo lagu dilay in ka badan 10 AS ah

Soomaaliya, 10 Febraayo 2026 (Dawan) - Ciidamada Soomaaliya ayaa 14 xubnood oo ka tirsan Al-Shabaab ku dilay howlgal qorsheysan oo ka dhacay gobolka Jubbada Hoose maanta oo talaado ah, sida ay sheegtay Wasaaradda Gaashaandhigga.

Howlgalkan oo ay fuliyeen Ciidanka Kumaandooska Danab oo kaashanaya ciidanka nabad-sugidda dowlad goboleedka Jubbaland, ayaa lala beegsaday fariisimo ay kooxda ku lahaayeen deegaannada ku teedsan magaalada Jamaame.

"Howlgalka waxaa lagu dilay 14 dhagarqabe, mid kalena waa la dhaawacay, halka maleeshiyaadkii kale ay ka carareen goobta.," ayay Wasaaradda Gaashaandhiggu ku sheegtay war-saxaafadeed.

Wasaaradda ayaa intaas ku dartay in Ciidanka Xoogga Dalka Soomaaliyeed (SNA) ayaa mar kale xaqiijiyeen sida ay ka go'an tahay ciribtirka dagaalamayaasha Alshabaab si loo xaqiijiyo xasilloonida dalka.