Muqdisho (Dawan)- Ciidamada Qalabka Sida ee Soomaaliya, oo kaashanaya saaxiibada caalamiga ah, ayaa fuliyay hawlgallo duqeymo ah oo lagu dilay 29 xubnood oo Al-Shabaab oo ku sugnaa deegaanka Jabad Godane ee gobolka Shabeellaha Dhexe.
Wasaaradda Gaashaandhiga Soomaaliya oo soo saartay war-saxaafadeed ayaa sheegtay in Hawlgalladan oo socday xalay ilaa saaka, lagu dilay 29 dagaalamayaal oo ka tirsanaa kooxda Al-shabaab iyada oo sdoo kale lagu burburiyay gaadiid iyo hub ay wateen xubnihii ururka ka tirsanaa ee ku sugnaa goobta laga fuliyay howlgalka.
War-saxaafadeedka ayaa lagu sheegay in dowladda ay ka go’an tahay dagaalka ay kula kirto Al-shabaab isla markaan ay sii wadi doonto ilaa ay ka adkaato. " Wasaaradda Gaashaandhigga iyo Taliska Ciidanka Xoogga Dalka Soomaaliyeed waxay mar kale ballanqaadayaan in howlgallada ka dhanka ah argagixisada ay sii socon doonaan ilaa laga xaqiijiyo nabadda iyo xasilloonida guud ee dalka.," ayaa lagu yiri bayaanka ka soo baxay Wasaaradda.
