Turkiga (Dawan)— 275 askari oo ka tirsan Ciidanka Xoogga Dalka Soomaaliyeed ayaa tababarka aasaasiga ah ee Kumaandooska ku soo dhammaystay magaalada Kayseri ee dalka Turkiga, halkaas oo loogu qabtay munaasabad qalin-jabin ah.
Sida ay baahisay Safaaradda Turkiga ee Soomaaliya, munaasabadda waxaa qabtay Taliska Guutada 1-aad ee Ciidamada Cirka Lagaga Dego iyo Kumaandooska ee magaalada Kayseri, iyadoo askartu si guul leh u dhammaysteen tababarka. Wasaaradda Gaashaandhigga Turkiga ayaa sheegtay in munaasabadda qalin-jabintu ay dhacday 6-dii Nofeembar 2026.
Tababarkan ayaa qayb ka ah iskaashiga milatari ee muddada dheer ka dhexeeya Soomaaliya iyo Turkiga, kaas oo diiradda lagu saarayo dhismaha awoodda Ciidanka Xoogga Dalka iyo tayeynta xirfadaha ciidamada.
Labada dal ayaa sannadkii 2010 bilaabay heshiisyada iskaashiga tababarka milatari, halka Turkigu uu 2017 Muqdisho ka furay xarunta tababarka ciidamada ee TURKSOM, oo tan iyo xilligaas tababartay kumannaan askari iyo saraakiil Soomaaliyeed.