Jabuuti (Dawan)- IGAD ayaa ka digtay soo laba-kacleynta burcad-badeedda xeebaha Soomaaliya iyo Gacanka Cadmeed, iyadoo sheegtay in falalkaasi qeyb ka yihiin khataraha sii kordhaya ee wajahaya marinnada ganacsiga gobolka. Digniinta ayaa ku jirtay war-murtiyeed laga soo saaray shirkii 74-aad ee aan caadiga ahayn ee Golaha Wasiirrada IGAD, oo Talaadadii lagu qabtay magaalada Jabuuti.
Wasiirrada ayaa sheegay in tartanka istaraatiijiyadeed, colaadaha ka jira dalalka ku teedsan badda, joogitaanka militari ee dibadda iyo weerarrada ka dhanka ah maraakiibta ganacsigu ay waxyeello u geysanayaan amniga iyo danaha dhaqaale ee dalalka gobolka.
IGAD ayaa sheegtay in badqabka iyo xorriyadda isu-socodka maraakiibta Badda Cas iyo Gacanka Cadmeed ay yihiin mudnaan muhiim u ah nabadda, amniga iyo horumarka gobolka. Goluhu wuxuu faray xoghaynta IGAD inay dalalka xubnaha ah iyo saaxiibada caalamiga ah kala shaqeyso xoojinta maamulka iyo isku-duwidda amniga badda.
