IGAD oo Ku Baaqday Xoojinta Iskaashiga Gobolka

Kulanka ayaa xooga lagu saaray sidii loo xoojin lahaa iskaashiga iyo isku-duwidda heer gobol ee lagama maarmaanka u noqotay barakaca sii kordhaya ee Geeska Afrika. Furitaanka shirka, Danjire Moussa Meigague, Agaasimaha Waaxda Caafimaadka iyo Horumarinta Bulshada ee IGAD, ayaa gudbiyay farriinta Xoghayaha Fulinta. Wuxuu carabka ku adkeeyay muhiimadda ay leedahay in dib loo eego horumarka, la aqoonsado casharrada muhiimka ah, lana dejiyo tallaabooyin cusub oo lagu xoojinayo ilaalinta iyo xalalka waara ee dadka barakacayaasha ah. “Shirkan wuxuu noo oggolaanayaa inaan qiimeyno wixii horumar ah, aqoonsanno casharrada muhiimka ah, isla markaana qeexno tallaabooyin wax ku ool ah oo lagu xoojinayo ilaalinta iyo xalalka waara ee dadka barakacayaasha ah ee gobolka,” ayuu yiri. Shirka oo uu guddoomiyay Houssein M. Chardi, Ku-xigeenka Xoghayaha Guud ee ONARS, ayaa lagu soo bandhigay sawir cad oo ka turjumaya xaaladda bani’aadannimo ee weli taagan. Wuxuu sheegay in in ka badan 5.4 milyan oo qaxooti iyo magangalyo-doon ah ay maanta ku nool yihiin dalalka IGAD — taas oo ka dhigaysa mid ka mid ah gobollada ugu saameynta badan dunida. “Jabuuti waxa ay martigelisaa qaxooti gaaraya in ka badan 3% dadka dalka ku nool,” ayuu yiri Chardi, isagoo hoosta ka xariiqay in khayraadka xaddidan iyo hoos u dhaca maalgelinta caalamiga ah aysan wiiqin go’aankooda ku aaddan difaaca iyo sharafta dadka barakacayaasha ah. Chardi ayaa sidoo kale ka hadlay hoos u dhaca sii socda ee taageerada caalamiga ah — gaar ahaan tan UNHCR — isagoo adkeeyay muhiimadda ay leedahay in la helo qaab wadajir ah oo mideeya siyaasadaha iyo dadaallada gobolka: “Waqtigaan oo kale, madasha IGAD waa mid aan la beddeli karin. Waxay noo suurtagelisaa inaan mideyno siyaasadaha, dheellitirno dadaallada, oo aan soo jiidanno kheyraad lagu dhisayo adkeysiga qaxootiga iyo bulshooyinka martida loo yahay.” Shirka waxaa kasoo qeybgalay madaxda hay’adaha qaxootiga ee dalalka IGAD, khubaro ku takhasustay ilaalinta, iyo wakiillo farsamo oo ka socda IGAD iyo Dowladda Sweden. Ka qaybgalayaashu waxay si isku mid ah u caddeeyeen baahida loo qabo xalal waara oo ku saleysan iskaashi goboleed iyo mideynta dadaalka. Afhayeenka Safaaradda Sweden ayaa dhankiisa sheegay in dalkoodu Ku faanayo inuu taageero mashruuc si toos ah u wanaajinaya nolosha malaayiin qof oo barakacayaal ah oo ku nool gobolka IGAD. Shirka IGAD ee Jabuuti ka dhacay ayaa mar kale iftiimiyey baaxadda iyo culayska barakaca khasabka ah ee ka jira Geeska Afrika, halkaas oo malaayiin qof ay wajahaan nolol adag oo ka dhalatay colaado, abaaro iyo sababo dhaqaale. IGAD iyo waddamada xubnaha ka ah ayaa isku raacay in xalalka waara aysan suurtagal noqon karin meel kasta oo gooni u shaqaysa, balse ay u baahan yihiin isku-duwid iyo iskaashi mideysan. subheadline iigu samey