New York (Dawan)— Imaaraadka Carabta, oo ay matalaysay Wasaaradda Arrimaha Gudaha, ayaa martigeliyay kulan ay yeesheen Kooxda La-talinta Istiraatiijiga ah ee Booliska (Strategic Police Advisory Group - SPAG), kaas oo diiradda lagu saaray taageerada booliska, ku dhaqanka sharciga iyo dib-u-habaynta waaxda amniga Soomaaliya. Kulanka ayaa lagu qabtay xarunta Ergada Joogtada ah ee Imaaraadka Carabta u qaabilsan Qaramada Midoobay, sida ay ergadu ku sheegtay qoraal ay maanta oo Arbaca ah ku baahisay barta X.
Kulanka ayaa lagu soo bandhigay warbixin ku saabsan taageerada Qaramada Midoobay ee Soomaaliya, oo ay ku jiraan dadaallada lagu xoojinayo awoodda booliska, horumarinta ku dhaqanka sharciga iyo dib-u-habaynta hay’adaha amniga.
Qaramada Midoobay ayaa Soomaaliya ka taageerta dhismaha nidaam boolis federaal ah oo awood leh, isla markaana lala xisaabtami karo, iyadoo taageeradu ay ku jirto talooyin siyaasadeed, isku-dubbaridka taageerada caalamiga ah, tababarro iyo dhisidda awoodda hay’adaha.
Barnaamijka Booliska ee Qaramada Midoobay wuxuu sidoo kale taageeraa hirgelinta nidaamka booliska federaalka ee Soomaaliya, kaas oo ku salaysan Qaab-dhismeedka Booliska Cusub ee 2016 iyo dib-u-eegistii Qaab-dhismeedka Amniga Qaranka ee 2023.
