Bariga Afrika (Dawan ) — Hay'adda Sanduuqa Lacagta Adduunka (IMF) ayaa ka digtay in dhaqaalaha dalalka Bariga Afrika ay si weyn ugu nugul yihiin saameynta dhaqaale ee ka dhalanaysa dagaalka ka socda Bariga Dhexe, iyadoo kororka qiimaha tamarta iyo carqaladeynta qulqulka ganacsiga caalamiga ahi ay bilaabeen inay saameyn ku yeeshaan gobolka.
Hay’addu waxay sheegtay in dalalka ku tiirsan soo dejinta tamarta — oo ay ku jiraan dalal badan oo Bariga Afrika ka tirsan — ay ka mid yihiin kuwa ugu nugul khataraha, maadaama ay kordhayaan kharashaadka soo dejinta shidaalka, isla markaana ay sii kordhayaan cadaadisyada saaran kaydka lacagaha qalaad.
IMF ayaa sidoo kale tilmaantay in dalalka ku tiirsan silsiladaha sahayda caalamiga ah ay wajahaan caqabado saadka iyo gaadiidka ah, kadib markii maraakiibta ganacsiga lagu qasbay inay beddelaan waddooyinkii caadiga ahaa. Tani waxay sare u qaadday kharashaadka xamuulka iyo caymiska, isla markaana dib u dhigtay gaarsiinta badeecadaha.
Warbixintu waxay intaa ku dartay in hakad ku yimaada dhoofinta bacriminta — oo qayb weyn oo ka mid ah soo maraan Khaliijka — ay saameyn ku yeelan karto wax-soo-saarka beeraha, taas oo kordhin karta khatarta sicir-bararka cuntada iyo amni-darrada cunnada ee gobolka.
