Imisa arday ayaa gudubtay imtixaanka Fasalka 12-aad ee Soomaaliya?

Muqdisho (Dawan)- Wasaaradda Waxbarashada, Hiddaha iyo Tacliinta Sare ee Soomaaliya ayaa maanta shaacisay natiijada imtixaanka shahaadiga ah ee fasalka 12-aad, iyadoo tirada ardayda ku guuleysatay imtixaanka ay kor u dhaaftay 40 kun.

Wasaaradda ayaa sheegtay in imtixaanka sannadkan loo diiwaangeliyey 44,330 arday, hase yeeshee ay u fariisteen 42,916 arday. Ardayda imtixaanka gashay ayaa isagu jiray 24,407 wiilal iyo 18,509 gabdhood.

Natiijada la shaaciyey ayaa muujinaysa in 40,037 arday ay gudbeen, halka 2,879 arday ay ku dhaceen, taas oo ka dhigan in 92.81 boqolkiiba ardaydii imtixaanka u fariisatay ay ku guuleysteen.

Imtixaanka ayaa laga galay lix dowlad-goboleed, 58 degmo iyo 158 xarumood.

Saddexda Arday ee ugu Sarreeya

Kaalinta koowaad waxaa galay Maxamed Ciise Daahir, oo ka socday Iskuulka Howl-wadaag ee Gobolka Banaadir.

Kaalinta labaad waxaa gashay Farxiyo Faarax Cumar, oo ka socotay Iskuulka Axmed Binu Xambal ee Jubaland.

Kaalinta saddexaad waxaa xajisatay Aamino Khaalid Cabdalla, oo ka socotay Iskuulka Imaamu Shaafici ee Gobolka Banaadir.

Dhanka kale, Wasaaradda Waxbarashada ayaa sheegtay in 70 arday laga baabi’iyey imtixaanka, iyadoo ardayda qaarkood laga baabi’iyey hal ilaa saddex maaddo.

Wasiir-dowlaha Wasaaradda Waxbarashada, Nuura Mustafe, ayaa sheegtay in ardayda maaddooyinka laga baabi’iyey dib loo qiimeyn doono, iyadoo la eegayo nooca baabi’inta lagu sameeyey imtixaankooda.

“Haddii imtixaankii laga cancelay, qiimeynta ayey ku laabanayaan; imtixaanka ayey dib u geli doonaan,” ayay tiri Nuura Mustafe.

Imtixaankan ayaa noqonaya kii 12-aad ee ay Dowladda Federaalka Soomaaliya qaaddo, tan iyo markii dib loo soo celiyey imtixaannada qaranka sannadkii 2015, kaddib burburkii dowladdii dhexe ee Soomaaliya sannadkii 1991.

Natiijada sannadkan ayaa kusoo beegmaysa xilli ay sannadba sannadka ka dambeeya sii kordhayaan tirada ardayda u fariisata imtixaanka shahaadiga ah, kuwaas oo doonaya inay u gudbaan waxbarashada jaamacadaha.