Ankara (Dawan) – In ka badan 300 oo arday Soomaaliyeed ayaa ka qalin-jabiyay jaamacadaha ku yaalla magaalada Ankara ee caasimadda Turkiga intii lagu jiray sanad-dugsiyeedka 2025–2026, waxaana munaasabad lagu maamuusay guusha ay ka gaareen waxbarashada heerarka kala duwan lagu qabtay magaaladaas.
Munaasabadda, oo la qabtay 14-kii Luulyo 2026, waxaa ka qeybgalay Lataliyaha Koowaad ee Safaaradda Soomaaliya ee Turkiga, Ismaaciil Ibraahim Aadan, Xildhibaan Mahad Cawad, u qeybsanaha Arrimaha Waxbarashada ee Safaaradda Soomaaliya, Marwo Caaisha Maxamuud, Sheekh Maxamed Idris iyo xubno kale oo ka tirsan bulshada Soomaaliyeed ee Turkiga.
Mas’uuliyiintii ka hadlay munaasabadda ayaa uga mahadceliyay dowladda Turkiga, jaamacadaha dalkaas iyo hay’adaha bixiya deeqaha waxbarasho doorka ay ka qaataan taageeridda ardayda Soomaaliyeed iyo horumarinta fursadaha waxbarasho.
Sida lagu sheegay xog ay daabacday Akadeemiyadda Sirdoonka Qaranka Turkiga, oo ku saleysan nidaamka xogta tacliinta sare ee dalkaas, 2,126 arday Soomaaliyeed ayaa ka qalin-jabiyay jaamacadaha Turkiga intii u dhexeysay sannadihii 2013 ilaa 2023.
Warbixintu waxay xustay in ardayda Soomaaliyeed ay ka dhignaayeen 11.41% tirada guud ee 18,630 arday Afrikaan ah ee muddadaas ka qalin-jabiyay jaamacadaha Turkiga. Warbixinta, oo la daabacay bishii Nofeembar 2025, ayaa waxbarashada ku tilmaantay mid ka mid ah tiirarka ugu muhiimsan ee xiriirka Soomaaliya iyo Turkiga.
