Imisa Arday ayaa sannadkan u fariisatay imtixaanka Fasalka 8-aad ee Deegaanka Soomaalida?

Jigjiga (Dawan) – In ka badan 29,000 oo arday ayaa maanta oo Khamiis ah u fariistay imtixaanka shahaadiga ah ee fasalka siddeedaad ee Deegaanka Soomaalida , sida ay baahisay warbaahinta SRTV.

Daahfurka imtixaanka ayaa si rasmi ah uga dhacay magaalada Jigjiga, waxaana ka qayb galay Madaxweyne Ku-xigeenka Deegaanka Soomaalida, Ibraahim Cusmaan Faarax, iyo Wasiirka Xafiiska Waxbarashada, Maxamed Sheekh Aadan.

Sida ay masuuliyiintu sheegeen, guud ahaan 29,631 arday oo ka kala socda 704 dugsi ayaa imtixaanka ku galaya 113 xarumood oo ku yaalla degmooyinka iyo maamul-magaalooyinka deegaanka.

Maamulka ayaa sheegay in ardayda wax ka barata dugsiyada tuulooyinka la isugu geeyay xarumaha degmooyinka, si loo xoojiyo hufnaanta imtixaanka loogana hortago qishka iyo xatooyada su'aalaha.

Mas’uuliyiintu waxay sidoo kale xuseen in ardayda u fariisanaysa imtixaannada shahaadiga ah la siiyay casharro dheeraad ah oo kabis ah intii lagu jiray sannad-dugsiyeedka, si kor loogu qaado heerka diyaar-garowgooda iyo natiijooyinka waxbarasho.