Miqdisho(Dawan) – In ka badan 46,000 arday ayaa maanta oo Isniin ah magaalada Muqdisho uga fariistay imtixaanka shahaadiga ah ee Fasalka 8-aad ee dugsiyada Gobolka Banaadir, sida ay sheegeen mas’uuliyiinta waxbarashada gobolka.
Imtixaanka waxaa si rasmi ah u daahfuray Guddoomiyaha Gobolka Banaadir ahna Duqa Magaalada Muqdisho, Xasan Maxamed Xuseen (Muungaab), oo ardayda iyo waalidiintooda u diray hambalyo, kuna dhiirrigeliyay inay guul ka gaaraan imtixaanka.
Mas’uuliyiinta waxbarashada Gobolka Banaadir ayaa xaqiijiyay in sanadkan ay imtixaanka u fariisteen 46,225 arday, kuwaas oo imtixaanka ku gelaya 125 xarumood oo ku yaalla degmooyinka kala duwan ee Muqdisho.
Ardayda imtixaanka gashay ayaa isagu jirta 24,717 wiil iyo 21,508 gabdhood, sida ay sheegeen masuuliyiintu. Sidoo kale, waxaa ka mid ahaa arday ajaanib ah, oo ay ku jiraan arday Suudaaniyiin ah oo ku sugan Muqdisho, inkastoo aan la shaacin tiradooda rasmiga ah.
