Itoobiya (Dawan) – Baarlamaanka Itoobiya ayaa Talaadadii ansixiyay miisaaniyadda sannadlaha ah ee sannadka maaliyadeedka 2026/27, taas oo gaareysa ku dhowaad $14.6 bilyan, isla markaana ah miisaaniyad rikoodh cusub ah.
Sannadka maaliyadeedka cusub ayaa bilaabanaya 8-da Luulyo 2026, iyadoo miisaaniyaddan lagu taageerayo qorshayaasha dowladda ee dhinacyada horumarinta dhaqaalaha, adeegyada bulshada iyo mashaariicda waaweyn ee dalka.
Guddoomiyaha Guddiga Joogtada ah ee Arrimaha Qorsheynta, Miisaaniyadda iyo Maaliyadda ee Baarlamaanka Itoobiya, Desalegn Wedaje, ayaa sheegay in 1.49 trillion birr laga soo saari doono canshuuraha gudaha, halka 93.7 bilyan birr lagu dabooli doono deeqaha iyo amaahda ay Itoobiya ka hesho hay’adaha horumarinta.
Miisaaniyadda cusub ayaa mudnaan siinaysa dhinacyada waxbarashada, waddooyinka, caafimaadka, beeraha, ballaarinta tamarta iyo horumarinta magaalooyinka, iyadoo 15.1% loo qoondeeyay dowlad-goboleedyada dalka, taas oo muujinaysa koror dhan 17.8% marka loo eego sannadkii hore.
Ra’iisul Wasaaraha Itoobiya, Abiy Axmed, ayaa sheegay in dib-u-habaynta dhaqaalaha ee dalku ay si weyn u xoojisay adkeysiga dhaqaalaha, dardargelisay koboca iyo soo kabashada dhaqaalaha, isla markaana abuurtay jawi u saamaxay dalka inuu ka gudbo caqabadihii hore una gudbo marxalad horumarineed.
