Imisa dal ayaa ka qeybgalay tartanka orodka ee Hargeysa?

Hargeysa (Dawan) — Orodyahanno ka socday Somaliland iyo shan dal oo Afrikaan ah ayaa ka qayb galay tartanka afraad ee Hargeysa International Half Marathon, oo Jimcihii lagu qabtay magaalada Hargeysa. Tartanka 21-ka KM waxaa soo qabanqaabiyay Xiriirka Ciyaaraha Fudud ee Somaliland iyo Wasaaradda Dhallinyarada iyo Ciyaaraha.

Sida ay sheegtay Wasaaradda Dhallinyarada iyo Ciyaaraha Somaliland, tartanka waxaa ka qayb galay orodyahanno ka kala socday Somaliland iyo shan dal oo Afrikaan ah kuwaas oo kala ah : Itoobiya, Chad, Jamhuuriyadda Dimuqraadiga ah ee Congo, Jamhuuriyadda Congo iyo Angola.

Tartanka ayaa laga bilaabay Royal Plaza Hotel, waxaana lagu soo gabagabeeyay Hargeisa Stadium. Sidoo kale waxa la qabtay orodka 5-ta KM ee haweenka, kaas oo ay ka qayb galeen ku dhowaad 30 gabdhood, sida ay sheegeen qabanqaabiyeyaasha.

Wasiirka Dhallinyarada iyo Ciyaaraha Somaliland, Axmed-yaasiin Maxamed Faarax, ayaa guusha orodyahanka Somaliland ku tilmaamay guul u soo hoyatay Somaliland, kaddib markii orodyahan maxalli ah uu kaalinta koowaad ka galay tartanka.

Wasiirku wuxuu hambalyo u diray dhammaan orodyahannadii ka qayb galay tartanka, iyo haweenkii ku tartamay orodka 5-ta KM. Waxa uu sidoo kale dhallinyarada Somaliland ku boorriyay inay horumariyaan hibadooda, isaga oo sheegay in orodku ka mid yahay hibada ay dhallinyaradu ku muujin karaan awooddooda isla markaana ay kula jaanqaadi karaan tartamada caalamiga ah.

Orodyahan Fu’aad Siciid oo Somaliland ku matalayay tartanka ayaa ku guulaystay kaalinta koowaad ee orodka 21-ka KM. Fu’aad ayaa tartankii sannadkii hore galay kaalinta labaad.

Ciidamo amni ayaa la geeyay jidka uu ka socday tartanka 21-ka KM, iyadoo isu socodka gaadiidka la xaddiday intii uu tartanku socday. Tartankan ayaa ahaa kii afraad ee Hargeysa International Half Marathon.