Imisa degmo ayaa laga qabanayaa doorashada Koonfur Galbeed?

Baydhabo(Dawan) – Guddiga Madaxa-bannaan ee Doorashooyinka Qaranka iyo Soohdimaha (GMDQS) ayaa shaaciyay liiska rasmiga ah ee ururrada siyaasadeed ee u tartamaya doorashooyinka degmooyinka ee Dowlad-Goboleedka Koonfur Galbeed Soomaaliya.

Warqad ka soo baxday guddiga oo la soo saaray habeenkii Talaadada ayaa lagu xaqiijiyay in 32 urur siyaasadeed ay u tartami doonaan kuraasta golayaasha deegaanka ee 12 degmo oo ka tirsan Koonfur Galbeed.

Degmooyinka lagu xusay wareegtadan waxaa ka mid ah Baydhabo, Baraawe, Marka, Afgooye, Wanlaweyn, Buur-Hakaba, Waajid, Berdaale, Diinsoor, Xudur, Ceelbarde iyo Qansax Dheere.

Ururrada diiwaangashan waxaa ka mid ah Badbaado Bulsho, Barwaaqo iyo Midnimada Shacabka, taas oo muujinaysa tartan siyaasadeed oo ballaaran, iyadoo dalka uu u gudbayo nidaamka doorashada tooska ah ee “hal qof, hal cod.”

Guddiga Doorashooyinka ayaa hore u shaaciyay in 28-ka Abriil 2026 ay tahay taariikhda loo qorsheeyay qabashada doorashooyinka heer golayaasha deegaanka ee dowlad-goboleedka.

Liiskan cusub ayaa muujinaya diyaar-garowga doorashooyinka Koonfur Galbeed ee ay waddo dowladda Federaalka Soomaaliya, xilli ay dhowaan gobolkaasi ka jireen xiisado amni iyo kuwo siyaasadeed.