Imisa goobood ayaa loo asteeyay codeynta Koonfur Galbeed?

Baydhabo (Dawan)- Guddiga Madaxa-bannaan ee Doorashooyinka ayaa maanta si rasmi ah u shaaciyay goobaha loo asteeyay codeynta doorashada qof iyo cod, taas oo la filayo in ay ka dhacdo deegaannada maamulkaas.

Guddiga ayaa sheegay in bulshada Koonfur Galbeed ay codkooda ka dhiiban doonaan 74 goobood, kuwaas oo ku kala yaalla 13 degmo oo ka tirsan dowlad-goboleedka.

Guddoomiyaha Guddiga Doorashooyinka, Cabdikarin Axmed Xasan, ayaa xusay in tirada dadka la filayo inay ka qeyb qaataan doorashadan ay kor u dhaafeyso 400,000 oo qof, taas oo muujineysa heerka ka-qeybgalka dadweynaha ee geeddi-socodka doorashooyinka Koonfur Galbeed.

Sidoo kale, guddoomiyuhu wuxuu xaqiijiyay in maanta magaalada Muqdisho laga daabulay qalabkii ugu dambeeyay ee doorashada, si loogu diyaariyo hirgelinta doorashada qof iyo cod ee Koonfur Galbeed.

Guddiga Doorashooyinka ayaa horey u shaaciyay in 10-ka bisha May ay si rasmi ah u bilaaban doonto doorashada, iyadoo la filayo in shacabka deegaannada Koonfur Galbeed inay u dareeraan goobaha codeynta si ay u doortaan hoggaankooda.

Doorashadan ayay dad badan u arkaan mid muhiim u ah geeddi-socodka dimuqraadiyadda dalka, gaar ahaan dadaallada lagu xoojinayo nidaamka doorashooyinka tooska ah ee Soomaaliya, halka dhinacyo badan oo siyaasadeed ay aad uga soo horjeedaan hanaanka loo wajahayo doorashooyinka.