Imtixaanka xaqiijinta tayada Macallimiinta oo ka bilowday Jigjiga

Jigjiga (Dawan) – Xafiiska Waxbarashada Dowladda Deegaanka Soomaalida ayaa si rasmi ah u daahfuray imtixaanka xaqiijinta tayada xirfadlayaasha waxbarashada, kaas oo ay u fariisteen 295 macallin oo ka qalin-jebiyay kulliyadaha waxbarashada ee deegaanka.

Imtixaanka oo ka qabsoomay Kulliyadda Waxbarashada ee Dowladda Deegaanka Soomaalida ayaa ujeeddadiisu tahay in lagu qiimeeyo aqoonta iyo xirfadda macallimiinta, si loo xaqiijiyo tayada waxbarashada loona helo macallimiin karti u leh soo saarista arday leh aqoon iyo xirfad wanaagsan.

Munaasabadda furitaanka waxaa ka qayb galay mas’uuliyiin ka tirsan Xafiiska Waxbarashada iyo maamulka kulliyadda, kuwaas oo sheegay in imtixaankani qayb ka yahay dadaallada lagu horumarinayo tayada waxbarashada iyo kor u qaadista heerka xirfadeed ee macallimiinta.

Maareeyaha Kulliyadda Waxbarashada Macallimiinta ee Dr. C/majiid Xuseen, Maxamed Ayaanle, ayaa sheegay in imtixaanku yahay hannaan muhiim ah oo lagu xaqiijinayo in macallimiinta cusub ay leeyihiin aqoonta iyo xirfadaha looga baahan yahay shaqada waxbaridda.

Waxa uu xusay in nidaamka waxbarashada ee Dowladda Deegaanka Soomaalida uu ku dhisan yahay isla xisaabtan iyo qiimayn joogto ah oo lagu sameeyo ardayda, macallimiinta iyo dugsiyada, si loo hubiyo tayada waxbarashada.

Maxamed Ayaanle ayaa sidoo kale sheegay in sannadkan la qiimeeyay in ka badan 3,000 oo macallin iyo barayaal isugu jira kuwo hore uga shaqaynayay dugsiyada iyo kuwo cusub oo loo diyaarinayo inay ku biiraan bahda waxbarashada.

Dhanka kale, maamulka Kulliyadda Waxbarashada ayaa sheegay in 295-ka macallin ee imtixaanka u fariistay ay waxbarasho ku qaadanayeen kulliyadda labadii sano ee la soo dhaafay, isla markaana imtixaankani door weyn ka qaadan doono hubinta tayada aqoonta ay muddadaas ku soo qaateen.

Mas’uuliyiintu waxay intaa ku dareen in macallimiinta ku guulaysta imtixaanka la siin doono shahaadada xaqiijinta tayada macallinnimada, halka kuwa aan ku guulaysan loo qorsheeyay inay mar kale qaataan imtixaanka si loo xaqiijiyo inay buuxiyeen shuruudaha xirfadeed ee looga baahan yahay.