In ka badan 20 AS ah oo lagu dilay Hiiraan

Hay’adda Sirdoonka Soomaaliya ayaa sheegtay in howlgallo ka dhacay Maxaas, Mukayle iyo Shaw lagu dilay 26 xubnood oo ka tirsan Al-Shabaab, laguna burburiyay xarumo iyo keyd hub.

May 21, 2026

2 daqiiqo akhris

Waxaa qoray Asha Elmi - Reporter

Muqdisho (Dawan ) – Hay’adda Sirdoonka iyo Nabadsugidda Qaranka (NISA) ayaa sheegtay in 26 ka tirsan Al-Shabaab lagu dilay howlgalallo ay ciidamadeedu ka fuliyeen deegaanno ka tirsan gobolka Hiiraan, iyadoo sidoo kale la burburiyay xarumo iyo agab ay kooxdaasi isticmaali jirtay.

War-saxaafadeed ay NISA soo saartay Khamiistan maanta ah ayay ku sheegtay in howlgalada, oo lagu fuliyay iskaashi ay la sameeyeen “saaxiibada caalamka,” ay ka dhaceen deegaannada Maxaas, Mukayle iyo Shaw ee gobolka Hiiraan.

Sida lagu sheegay bayaanka, howlgalka ugu horreeyay ayaa ka dhacay nawaaxiga degmada Maxaas, halkaas oo lagu bartilmaameedsaday Xubno ay hay’addu sheegtay in Al-Shabaab ku abaabuleysay deegaanka Madaxya-weyn. NISA ayaa sheegtay in weerarkaasi lagu dilay 14 xubnood oo ka tirsan kooxda, laguna gubay teendhooyin iyo gabbaadyo ay isticmaali jireen.

Maqaallo la xidhiidha

2 saac kahor

Maxay isku hayaan Wasiir Fiqi iyo Mucaaradka?

3 saac kahor

Jaamacadda Carabta oo mowqif adag ka qaadatay qorshaha Somaliland ee Qudus

Howlgal kale oo ka dhacay deegaanka Mukayle ayay NISA ku sheegtay in lagu dilay sagaal xubnood oo ka tirsan Al-Shabaab, oo uu ku jiro nin ay ku magacawday Sadaam, kaas oo hay’addu sheegtay inuu ahaa ku xigeenka kooxda ee deegaanka. NISA ayaa intaas ku dartay in 16 kale lagu dhaawacay howlgalkaasi.

Dhanka kale, howlgal saddexaad oo ka dhacay deegaanka Shaw ayaa lagu burburiyay xarumo lagu keydin jiray hubka iyo goob lagu dayactiri jiray qalabka dagaalka, sida ay sheegtay NISA. Hay’addu waxay sheegtay in saddex qof oo ay ku tilmaantay farsamo-yaqaanno ka tirsanaa Al-Shabaab lagu dilay goobtaasi, isla markaana la burburiyay gaari ay kooxda adeegsanaysay.

Howlgaladan ayaa kusoo aadaya xilli ciidamada dowladda Soomaaliya iyo kuwa deegaanka ay sii wadaan gulufyo militari oo ka dhan ah Al-Shabaab qaybo ka mid ah bartamaha Soomaaliya, iyadoo dowladda ay sheegtay inay doonayso in ay wiiqdo awoodda kooxda ee deegaannada ay wali ka joogto dalka.